СОНГИНОХАЙРХАН ДҮҮРГИЙН ПРОКУРОРЫН ГАЗАР, ЦАГДААГИЙН 1-Р ХЭЛТЭСТЭЙ ХАМТРАН \"НЭЭЛТТЭЙ ХААЛГА\"-НЫ ӨДӨРЛӨГ ЗОХИОН БАЙГУУЛЛАА

Сонгинохайрхан дүүргийн прокурорын газар дүүргийн Цагдаагийн I хэлтэс хамтран 2016 оны 05 дугаар сарын 26-ны өдөр иргэдэд "Нээлттэй хаалга"-ны өдрийг Сонгинохайрхан дүүргийн Засаг даргын байрны урд талбай дээр зохион байгууллаа. "Нээлтэй хаалга"-ны өдрийн арга хэмжээнд Сонгинохайрхан дүүргийн Засаг дарга М.Чинболд, ИТХ-ийн дарга Х.Нямбаатар, Тамгын газрын дарга Ш.Бат-Өлзий, Сонгинохайрхан дүүргийн прокурор, Хууль цаазын итгэмжит зөвлөх Д.Отгонбаяр, Сонгинохайрхан дүүргийн Цагдаагийн I хэлтсийн дарга, цагдаагийн хурандаа Ш.Цогбаатар нар болон Дүүргийн прокурорын газрын нийт прокурор, ажилтан, Цагдаагийн I хэлтсийн хэрэг бүртгэгч, мөрдөн байцаагч нар хүрэлцэн иржээ.

"Нээлттэй хаалга"-ны арга хэмжээний үеэр Дүүргийн Прокурор, Иргэдийн хурлын дарга нараас авсан ярилцлагыг хүргэе.

Дүүргийн прокурор, хууль цаазын итгэмжит зөвлөх Д.Отгонбаяр:

Сонгинохайрхан дүүрэг нутаг дэвсгэрийн хувьд том, хүн ам ихтэй. Үүнийгээ дагаад гэмт хэргийн гаралт нилээдгүй их байдаг. Тус дүүрэг нь Цагдаагийн 3 хэлтэстэй бөгөөд өнгөрсөн онд 10350 орчим гэмт хэргийн шинжтэй гомдол мэдээллийг хүлээн авч, үүнээс 3500 орчимд нь эрүүгийн хэрэг үүсгэн шалгасан.

Эдгээр эрүүгийн хэргийн ард олон хүний амь нас, бие махбодь, эд хөрөнгийн гээд хохиролууд учирсан байдаг. Иймээс гэмт хэргээс урьдчилан сэргийлэх, гарсан гэмт хэрэгтэй тэмцэх нь хуулийн байгууллагуудын үйл ажиллагааны нэгэн хэсэг бөгөөд хууль хяналтын байгууллага энэ чиглэлээр нягт хамтран ажиллах шаардлагатай.Манай дүүргийн Засаг даргын Тамгын газар, Иргэдийн хурал, Гэмт хэргээс урьдчилан сэргийлэх зөвлөл бидний ажлыг дэмжиж хамтран ажилладаг.

Сонгинохайрхан дүүргийн Иргэдийн төлөөлөгчдын хурлын дарга Х.Нямбаатар:

Сонгинохайрхан дүүргийн Гэмт хэргээс урьдчилан сэргийлэх ажлыг зохицуулах зөвлөлийн ажил маш сайн явагдаж байгаа. Би хэдхэн тоо хэлье. Улсын хэмжээнд гэмт хэргийнхээ илрүүлэлтээр Сонгинохайрхан дүүргийн Цагдаагийн I хэлтэс I байранд, Цагдаагийн II хэлтэс Нийслэлийн хэмжээнд III байранд явж байгаа.

Энэ бол Сонгинохайрхан дүүргээр овоглосон Прокурор, Цагдаагийн байгууллагын нийт бие бүрэлдэхүүн, Гэмт хэргээс урьдчилан сэргийлэх ажлыг зохицуулах зөвлөл, Дүүргийн хамтын ажлын үр дүн гэж хэлэхийг хүсэж байна.

Өнгөрсөн жил Сонгинохайрхан дүүргийн прокурорын газар, Цагдаагийн 1, 2 ,3 дугаар хэлтсээс дүүргийн Гэмт хэргээс урьдчилан сэргийлэх ажлыг зохицуулах зөвлөлд санал ирүүлсэн. Энэ нь хэргийн шийдвэрлэлт удаашралтай байгаа гэмт хэргийн шийдвэрлэлтийг түргэтгэх, түдгэлзсэн хэргүүдийг сэргээж шийдвэрлэлтийг нь сайжруулах арга хэмжээ хамтарч зохион байгуулъя гэдэг саналыг тавьсан. Бид саналыг нь хүлээн авч хэлэлцэн, болзолт уралдаан зарлая гэдэг шийдвэр гаргасан. Энэ болзолт уралдааны явцад 800 гаруй хэргийн шийдвэрлэлт хийгдсэн байгаа. Энэ нь Улсын хэмжээнд салбартаа жишиг болохуйц ажил болсон.

Энэ жил 4-р сард яг өмнөх сэдвээрээ түдгэлзүүлсэн болон шийдвэрлэлт удаашралтай байгаа хэргүүдийг шийдвэрлэх болзолт уралдаан зарлаж, үр дүн нь маш сайн гарсан.

Тиймээс бид энэ арга хэмжээнд амжилттай оролцсон хууль хяналтын ажилтнуудаа шагнаж урамшуулах ажлыг зохион байгуулах гэж байна. Аливаа хууль хяналтын чиг үүргээ хэрэгжүүлж байгаа байгууллагын үндсэн үүрэг бол хүний эрхийг хангах, бусдын эд хөрөнгө, амь насыг гэмт хэрэг эрх зүйн зөрчлөөс хамгаалахад чиглэгддэг.Бид гэмт хэргээс урьдчилан сэргийлэх тал руугаа илүү хамтран ажиллаж ахиц дэвшил гаргая, иргэдэд хууль сурталчлах ажлыг олон арга хэлбэрээр зохион байгуулна гэсэн зорилттой байна. Энэ өдрийн Нээлттэй хаалганы арга хэмжээ ч дээрхи зорилтын хүрээнд хийгдэж байна.

Сонгинохайрхан дүүргийн Цагдаагийн I хэлтсийн ахлах мөрдөн байцаагч, цагдаагийн ахмад Д.Будзаан:

Гэмт хэргээс урьдчилан сэргийлэх, иргэдэд хууль сурталчлах чиглэлээр манай дүүргийн Прокурор, цагдаагийн байгууллага байнга хамтран ажилладаг. Үүний нэг жишээ бол өнөөдөрийн Нээлттэй хаалганы өдөрлөгийн арга хэмжээ юм. Энэ арга хэмжээ нь иргэдэд эрх зүйн мэдлэгийг өгөх, эрх зүйн зөвлөгөө өгөх, урьдчилан сэргийлэх чиглэлтээр зохион байгуулагдаж байна. Энэхүү арга хэмжээний үеээр нийт 200 гаруй иргэд эрх зүйн зөвлөгөө авч ажиллалаа. Ер нь бид прокурорын газартайгаа хамтын ажиллагааг сайжруулах чиглэлээр сургалт, спорт, урлаг гээд олон төрийн арга хэмжээг зохион байгуулан ажиллаж байгаа. Ингэж ойр дотно ажиллах нь бидний ажилд эерэг үр дүн авчирдаг. Тийм ч учраас манай I хэлтэс гэмт хэргийн илрүүлэлтээрээ улсын хэмжээнд I байранд явж байна. Саяхан бид түдгэлзүүлсэн хэргийг шийдвэрлэх аян зохион байгуулсан. Энэ аяны хүрээнд манай I хэлтэс гэхэд 123 түдгэлзүүлсэн хэргийн сэжигтэн, яллагдагчийг илрүүлэн тогтоож, хэргийг шийдвэрлэсэн.

Энэ арга хэмжээнд Прокурор, цагдаагийн байгууллагын алба хаагчид маань маш их идэвхитэй ажиллан үр дүн гаргаж ажилласан. Дүүргийн Засаг дарга, Иргэдийн хурлаас энэ аяндидэвхитэй ажиллаж үр дүн гаргасан прокурор, хэрэг бүртгэгч мөрдөн байцаагч нарыг урамшуулж БНХАУ-ын Манжуур хотод 5 хоног аялах эрхээр шагнасанд бид баяртай байна...гэлээ.

"Нээлттэй хаалга"-ны өдрөөр прокурорууд иргэдэд прокурорын байгууллагын чиг үүргийг сурталчлан, Гэмт хэргээс урьдчилан сэргийлэх талаар мэдээлэл хийж, иргэдийн санал хүсэлтийг хүлээн авч байлаа.

Өдөрлөгөөр нийт 275 иргэдэд хууль эрх зүйн мэдээллийг нэг дороос хүргэж, 50 гаруй төрлийн тараах материал, гарын авлага тарааж, 20гаруй иргэний санал, хүсэлтийг авч, газар дээр нь шийдвэрлэсэн байна

Нээлттэй хаалганы өдөрт оролцож гомдол хүсэлтээ шийдвэрлүүлсэн иргэдийн сэтгэгдэлээс:

Сонгинохайрхан дүүргийн 25 дугаар хорооны иргэн н.Батбаатар:

Өнөөдөр дүүрэг дээр Прокурор, Цагдаагийн байгууллагын хамтарсан Нээлттэй хаалганы өдрийн арга хэмжээ болж байгаа юм байна.Энэ арга хэмжээнд шүүхээс бас төлөөлөл ирсэн бол улам зохимжтой байх байсан болов уу гэж бодож байна. Дээр үедпрокурорын байгууллага хуулийн дээд хяналтыг тавьдаг байсан. Гэтэл сүүлийн жилүүдэд хаягдсан юм шиг байдал иргэний хүний хувьд ажигласан л даа. Одоо үйл ажиллагаа нь тодорхой, ил тод, нээлттэй болж гэмт хэрэг зөрчлөөс урьдчилан сэргийлэх талаар прокурор, цагдаа хоёр хамтарч ажиллаж байгаа нь сайхан л байна. Прокурор иргэн хүнд ойр, нээлттэй ил тод ажиллаж байгаад баяртай байна.

Тахилт иргэдийн зөвлөлийн гүйцэтгэх захирал Х.Баярмаа:

Би энэ өдрийн арга хэмжээг маш их дэмжиж байна. Яагаад гэвэл прокурор бол хуулийнхны дунд хамгийн чухал ажил хийдэг, цагдаагийн шалгасан хэргийн үнэн мөнийг нягталж хүнийг хэлмэгдүүлэхгүй байх гол үүргийг гүйцэтгэдэг хүн гэж би ойлгодог. Гэтэл иргэд прокурорын байгууллагын талаар бараг ойлголтгүй байдаг. Харин сүүлийн үед прокурор үйл ажиллагааныхаа талаар болон хууль сурталчилж радио, телевизоор ярьдаг болоод байна. Прокурор өнөөдөр өөрсдийн үйл ажиллагаагаа дүүргийн иргэддээ танилцуулж цагдаагийн байгууллагатай хамтарсан арга хэмжээ зохион байгуулж байгаад талархаж байна.

Сонгинохайрхан дүүргийн 17 дугаар хорооны иргэн Ш.Нацагням:

Өнөөдөр прокурор, цагдаа Дүүргийн талбайд иргэдэд зөвлөгөө өгч байна гэхээр нь би хүрч ирлээ. Шүүхээр хүүхдийн тэтгэвэр тогтоолгосон боловч авч чадалгүй, ямар журмаар яаж авхаа мэдэхгүй явсан юм. Сая энд байгаа прокуророос зөвлөгөө авч хаана хандахаа мэдэж авлаа. Иргэн бидэнд ийм л үйлчилгээ хэрэгтэй байгаа юм.

Сонгинохайрхан дүүргийн 24 дүгээр хорооны иргэн М.Болдсайхан:

Прокурорын байгууллагын талаар дэлгэрэнгүй ойлголт авлаа. Үнэндээ өөрсдөө хэрэг төвөгт орооцолдохгүй болхоор шүүх нь ч ял өгөөд байгаа юм уу, прокурор нь ч яллаад байгаа юм уу мэддэггүй юм. Өнөөдөр прокурор иргэддээ хандаж нээлттэй хаалганы өдөр зохиож байгаа нь маш зөв арга хэмжээ болж байна. Цаашид сар бүр хийж байвал зүгээр байна...гэлээ.

Ийнхүү Сонгинохайрхан дүүргийн прокурорын газар Цагдаагийн I хэлтсийн зохион байгуулсан "Нээлттэй хаалга"-ны өдөрлөг амжилттай явагдлаа. Иргэд сэтгэгдэл өндөртэй байлаа. Прокуроруудын ширээг иргэд дугаар үүсгэн зогсож зөвлөгөө авч байгаа нь Иргэдэд Эрх зүйн туслалцаа зөвлөгөө ямар хэрэгцээтэй байгааг харуулж байна.