ХЭРЭГ БҮРТГЭГЧ, МӨРДӨН БАЙЦААГЧ НАРЫН ДУНД АЖИЛ, МЭРГЭЖЛИЙН УРАЛДААН ЗОХИОН БАЙГУУЛЖЭЭ

 

Өвөрхангай аймгийн Хархорин сум дах сум дундын Прокурорын газар нь Цагдаагийн хэлтэстэй хамтран хэрэг бүртгэгч, мөрдөн байцаагч нарын хэрэг шалгах ур чадварыг дээшлүүлэх зорилгоор харьяа 7 сумдын хэсгийн төлөөлөгч, мөрдөн байцаагчдыг оролцуулсан хэрэг бүртгэгч, мөрдөн байцаагч нарын ажил, мэргэжлийн уралдааныг 2016 оны 06 дугаар сарын 03-ны өдөр зохион байгуулжээ.

 

Тэмцээний шүүгчээр тус сум дундын Шүүхийн ерөнхий шүүгч Х.Оюунжаргал, Ахлах прокурор Н.Батмөнх, Цагдаагийн хэлтсийн дарга, цагдаагийн дэд хурандаа Б.Очирдорж нар ажиллаж эрх зүйн мэдлэгийг сорих тест бөглүүлэх, бодлого бодуулах, эрх зүйн баримт бичиг үйлдүүлэх, тодорхой тохиолдолд хэрэг учралын газарт үзлэг хийлгүүлэх зэрэг хэлбэрээр явуулж, бусдыгаа хошуучилсан 3 хэрэг бүртгэгч, мөрдөн байцаагчийг шагнаж урамшуулжээ.

Мөн уралдааны үеэр прокурор, хэрэг бүртгэгч, мөрдөн байцаагч нарт криминалистикийн ахлах шинжээч Э.Ганбат, шинжээч эмч Ц.Амгалан нар "Шинжилгээний төрлүүд” "Шинжилгээ хийхэд анхаарах асуудлууд” сэдвээр 2 цагийн сургалт зохион байгуулсан байна.