Хамтарсан зөвлөгөөн хийжээ

  1. 2016-09-05
  2. Архив,
  3. 353 уншсан
  4. 1 минут уншина
A- A A+
Хамтарсан зөвлөгөөн хийжээ

Хан-Уул дүүргийн прокурорын газраас 2016 оны 08 дугаар сарын 30-ны өдөр тус дүүргийн Цагдаагийн 1 дүгээр хэлтсийн хэрэг бүртгэх тасгийн хэрэг бүртгэгч, хэсгийн байцаагч, прокурорын хамтарсан зөвлөгөөн зохион байгууллаа.  Зөвлөгөөнөөр тус хэлтсийн Хэрэг бүртгэх тасгийн  эрүүгийн хэргийн хэрэг бүртгэх ажиллагаанд Эрүүгийн байцаан шийтгэх ажиллагааны зорилт, зарчмуудын хэрэгжилтийг удирдамжийн дагуу шалгасан дүнг хэлэлцжээ. Шалгалтаар хөнгөн хэргийн илрүүлэлт болон түдгэлзүүлсэн хэргийн шийдвэрлэлт хангалтгүй байгаагаас хэрэг бүртгэх ажиллагааны чанар байдал доголдож, хуулийн хэрэгжилт хангалтгүй байна гэж дүгнэсэн байна.Тус хэрэг бүртгэх тасагт  2016 оны эхэнд 33 хэргийн үлдэгдэлтэй байсан байна. 08 дугаар сарын 01-ны өдрийн байдлаар  316 гомдол мэдээлэлд эрүүгийн хэрэг үүсгэн шалгаж, нийт 349 хэрэг хэрэгт ажиллагаа явуулснаас 73 хэргийг буюу 20.9 хувийг хялбаршуулсан журмаар хэрэг бүртгэлт явуулсан нь нийт хэрэг бүртгэлт явуулсан хэрэгтэй харьцуулахад илтэд хангалтгүй үзүүлэлт гарсан байна. Хэрэг бүртгэлт явуулсан  349 хэргээс  12 хэрэгт буюу 3.4 хувьд нь хугацаа сунгаж шалгасан, 131 хэрэг буюу 37.5 хувийг нь түдгэлзүүлж байсан зэргээс үзэхэд  эрүүгийн байцаан шийтгэх хуульд заасан " хэрэг бүртгэлт явуулах үндсэн хугацааны дотор ажиллагааг явуулж,  хэргийг шуурхай шийдвэрлэх” тухай хуулийн үндсэн зорилтыг хангаагүй гэж дүгнэжээ. Уг зөвлөгөөнөөр Эрүүгийн хэргийн хэрэг бүртгэлтийн ажиллагаа явуулахад тулгамдаж буй асуудал, хүндрэл бэрхшээл болон цаашид ажил сайжруулах талаар  хэрэг бүртгэгч нарт  үүрэг чиглэл өглөө.