ОНЦГОЙ БАЙДЛЫН ҮЕИЙН АЮУЛГҮЙ АЖИЛЛАГААНЫ ТАЛААРХ СУРГАЛТАНД ПРОКУРОР, АЖИЛТНУУД ХАМРАГДЛАА

Говь-Алтай аймгийн Прокурорын газраас "Прокурорын байгууллага, прокурор ажилтны аюулгүй байдлыг хангах журам”, "Прокурор, ажилтны нийгмийн баталгааг хангах, эрүүл мэндийг хамгаалах хөтөлбөр”-ийн хэрэгжилтийн хүрээнд шат дараалсан ажлуудыг зохион байгуулан ажиллаж байгаа бөгөөд 2016 оны 09 дүгээр сарын 15-ны өдөр аймгийн Онцгой байдлын газартай хамтран "Гал, гал түймрийн тухай ойлголт, Гал түймрийг унтраах аргууд, гал унтраах анхан шатны багаж хэрэгсэл галын аюулгүй байдлыг хангах, галын аюулаас урьдчилан сэргийлэх, Галын автоматикийн систем, Гамшгийн тухай ерөнхий ойлголт, урьдчилан сэргийлэх арга хэмжээг боловсронгуй болгох нь” сэдвүүдээр сургалт явуулж нийт прокурор, ажилтнууд болон Цагдаагийн газрын Олон нийтийн аюулгүй байдлыг хангах хэсгийн алба хаагчдыг хамруулан зохион байгуулжээ.

Сургалтыг тус аймгийн Онцгой байдлын газрын Гал түймэр унтраах, аврах 59-р ангийн салаан захирагч Б.Амгаланзаяа, Сургалт сурталчилгаа, урьдчилан сэргийлэх ажил хариуцсан мэргэжилтэн Б.Батдорж нар явуулсан ба галын дохиоллын ажиллагаа болон гал унтраах бодисын цэнэгтэй эсэхийг тогтмол шалган, доош харуулж цэнэглэж байх, гал гарч байгаа үед галын голомтоос бус гал тархаж буй хэсгээс эхлэн хумьж унтраах, галын төрөл, гал гарах хүчин зүйлс, гал гарсан үед хэрхэн ажиллах, галын аюулаас хэрхэн урьдчилан сэргийлэх, өөрийгөө болон бусдыг хэрхэн хамгаалах талаар онолын болон практик сургалт явуулсан нь сонирхолтой, үр дүнтэй ажил болжээ.

Мөн түүнчлэн тус газрын Гамшигаас хамгаалах улсын хяналтын байцаагч Ц.Амарсанаа байгууллагын галын аюулгүй байдлыг шалгаж цаашид анхаарах асуудлын талаар улсын байцаагчийн дүгнэлтийг гаргаж ажилласан байна.

Цаашид тус аймгийн прокурорын газраас гамшгаас хамгаалах сургалт, дадлагыг Онцгой байдлын газартай хамтран тогтмол зохион байгуулж байхаар шийдвэрлэжээ.