ПРОКУРОРЫН 2017 ОНЫ ҮРГЭЛЖИЛСЭН ШАТНЫ АНХНЫ СУРГАЛТАНД ХАМРАГДСАН ПРОКУРОРУУДАД СЕРТИФИКАТ ГАРДУУЛЛАА

  1. 2017-02-09
  2. Архив,
  3. 1723 уншсан
  4. 1 минут уншина
A- A A+
ПРОКУРОРЫН 2017 ОНЫ ҮРГЭЛЖИЛСЭН ШАТНЫ АНХНЫ СУРГАЛТАНД ХАМРАГДСАН ПРОКУРОРУУДАД СЕРТИФИКАТ ГАРДУУЛЛАА

Улсын Ерөнхий прокурорын 2016 оны А/03 тоот тушаалаар Прокурорын байгууллагын зорилт, чиг үүргийг хэрэгжүүлэх, хууль тогтоомжийн хэрэгжилтийг хангахад прокурорын мэдлэгийг дээшлүүлэх, мэргэжлийн ур чадварыг сайжруулах, прокурорыг чадавхжуулах, хэрэг хянан шийдвэрлэх ажиллагаа болон эрх зүйн маргаанд дүн шинжилгээ хийх, прокурорын үйл ажиллагааг дэмжсэн чадваржуулсан, байнгын тасралтгүй, системтэй сургалтыг явуулах зорилготой "Прокурорын сургалтын хөтөлбөр"-ийг боловсруулсны дагуу 2016 оноос эхлэн прокуроруудыг сургалтанд хамруулж эхэлсэн.

Ажилласан жил, ажлын туршлагыг харгалзан анхан болон үргэлжилсэн шатны гэсэн ангилалд хамруулан, сургалтыг явуулж байгаа бөгөөд 2017 оны үргэлжилсэн шатны анхны сургалт 2017 оны 02 дугаар сарын 06-наас 09-ны өдрүүдэд Улсын Ерөнхий прокурорын газрын "Сургалт, судалгааны төв"-д  явагдаж өндөрлөлөө.

Энэ удаагийн сургалтанд Нийслэл, Тээвэр, Дүүргийн прокурорын газруудад 4-өөс дээш жил ажиллаж байгаа 26 прокурор хамрагдсан бөгөөд 40 цагийн сургалтаар 17 төрлийн хичээлийг Сургалт, судалгааны төвийн багш, прокурорууд болон зочин багш нар заасан юм.

Сургалтын хамрагдсан прокуроруудад сертификат гардуулах арга хэмжээ 2017 оны 02 дугаар сарын 09-ны өдөр Улсын Ерөнхий прокурорын газарт болж Улсын Ерөнхий прокурорын туслах прокурор, Тамгын газрын дарга Ц.Арвинбуудай, Тамгын газрын орлогч дарга Ш.Сүхбат, Сургалт судалгааны төвийн захирал М.Гантулга нар гардуулан өгч баяр хүргэлээ.