СОНГИНОХАЙРХАН ДҮҮРГИЙН ПРОКУРОРЫН ГАЗРААС ХАМТАРСАН ЗӨВЛӨГӨӨН ЗОХИОН БАЙГУУЛЖЭЭ

  1. 2017-03-31
  2. Архив,
  3. 706 уншсан
  4. 1 минут уншина
A- A A+
СОНГИНОХАЙРХАН ДҮҮРГИЙН ПРОКУРОРЫН ГАЗРААС ХАМТАРСАН ЗӨВЛӨГӨӨН ЗОХИОН БАЙГУУЛЖЭЭ

Сонгинохайрхан дүүргийн прокурорын газрын 1 дүгээр улирлын төлөвлөгөөнд тусгагдсаны дагуу тус дүүргийн прокурорын газар, цагдаагийн 1, 2, 3 дугаар хэлтсийн нийт хэрэг бүртгэгч, мөрдөн байцаагч нарын хамтарсан зөвлөгөөнийг энэ сарын 29-нд зохион байгуулжээ. Зөвлөгөөнд Дүүргийн прокурор Д.Отгонбаяр "Прокурорын байгууллагын 2017 онд дэвшүүлсэн зорилт, эхний 3 сарын байдлаар хийж гүйцэтгэсэн ажил, хэрэг бүртгэх, мөрдөн байцаах ажиллагааны чанар, үр дүн, цаашид анхаарах асуудал”-ын талаар илтгэл тавьсан байна. Түүний дараа тус дүүргийн прокурорын орлогч  Б.Ууганбаатар,  Хэрэг бүртгэх, мөрдөн байцаах ажиллагаанд хяналт тавих ажил хариуцсан туслах прокурор Т.Мөнхжаргал нар "Хэрэг бүртгэгч, мөрдөн байцаагч нараас эрүүгийн байцаан шийтгэх хууль, аргачилсан зааврын заалтыг зөрчсөн зөрчлүүд, цаашид анхаарах асуудалын талаар” илтгэл тавьжээ.  Зөвлөгөөний үеэр Сонгинохайрхан дүүргийн цагдаагийн 3 дугаар хэлтсийн Мөрдөн байцаах тасгийн дарга, цагдаагийн дэд хурандаа Н.Баярбаатар "Хулгайлах гэмт хэрэг”-ийн илрүүлэлт, мөрдөн байцаалтын хугацаа сунгагдан шалгагдаж байгаа хэргийн шийдвэрлэлт"-ийн талаар тус тус мэдээлэл хийжээ. Хамтарсан зөвлөгөөний төгсгөлд дээрх мэдээллүүдтэй холбогдуулж санал, хүсэлт, ярилцлага өрнүүлсэн байна.

Зөвлөгөөнөөс:

-       Хэргийг анхны хугацаанд шийдвэрлэж байх, хугацаа сунгагдан шалгагдаж байгаа хэргүүд болон урьд оны үлдэгдэл 22 хэргийг 04 сард багтаан шийдвэрлэх,

-       Хэрэг бүртгэгч, мөрдөн байцаагч нар хэргийг Эрүүгийн байцаан шийтгэх хуульд заасны дагуу нотлох баримтыг бүрэн бүрдүүлж шүүхээс болон прокуророос хэргийг буцаахгүй байхад онцгой анхаарч ажиллах,

-       Түдгэлзүүлсэн хэрэг түүн дотроо Эрүүгийн байцаан шийтгэх хуулийн 205.1.1-с бусад үндэслэлээр түдгэлзүүлсэн хэргүүдийг шийдвэрлэх арга хэмжээ авч ажиллах,

-       Прокурор, хэрэг бүртгэгч, мөрдөн байцаагч нарын хамтын ажиллагааг дээшлүүлж ажиллах зэрэг шийдвэрүүдийг гаргаж ажиллажээ. Дүүргийн прокурорын газраас зөвлөгөөнөөс гарсан шийдвэрийн биелэлтийг дараагийн хамтарсан зөвлөгөөн дээр танилцуулахыг Цагдаагийн хэлтсүүдийн дарга нарт даалгасан байна.