ГЭМТ ХЭРГЭЭС УРЬДЧИЛАН СЭРГИЙЛЭХ АЖЛЫН ХҮРЭЭНД НЭЭЛТТЭЙ ХААЛГАНЫ ӨДӨРЛӨГ ЗОХИОН БАЙГУУЛАВ

  1. 2017-04-12
  2. Архив,
  3. 608 уншсан
  4. 1 минут уншина
A- A A+
ГЭМТ ХЭРГЭЭС УРЬДЧИЛАН СЭРГИЙЛЭХ АЖЛЫН ХҮРЭЭНД НЭЭЛТТЭЙ ХААЛГАНЫ ӨДӨРЛӨГ ЗОХИОН БАЙГУУЛАВ


Завхан аймгийн Тосонцэнгэл сум дахь сум дундын прокурорын газраас гэмт хэргээс урдьдчилан сэргийлэх ажлын хүрээнд болон Улсын Ерөнхий прокурорын 2015 оны 12 дугаар сарын 23-ны өдрийн А/121 дугаартай тушаалын хавсралтаар баталсан "Прокурор гэмт хэргээс урьдчилан сэргийлэх ажилд оролцох аргачилсан заавар”-т заасны дагуу Завхан аймгийн Тэс сумын нутаг дэвсгэрт байрлах Хилийн 0277 дугаар тусгай ангид нээлттэй хаалганы өдөрлөгийг энэ сарын 5,6-ны өдрүүдэд зохион байгуулжээ. Нээлттэй хаалганы өдөрлөгийг Хилийн 0277 дугаар тусгай ангиас хамтран ажиллах төлөвлөгөөний дагуу санал ирүүлсний үндсэн дээр Завхан аймгийн Тосонцэнгэл суманд үйл ажиллагаагаа явуулдаг хуулийн байгууллага болох Сум дундын Шүүх, Прокурор, Цагдаагийн хэлтэстэй хамтран оролцсон байна. Өдөрлөгт Хилийн цэргийн 0277 дугаар тусгай ангийн нийт бие бүрэлдэхүүн буюу 150 гаруй ажилтан, албан тушаалтан, хугацаат цэргийн албан хаагч нар болон тэдний ар гэрийнхэн хамрагдаж прокурорын байгууллагын үйл ажиллагаатай танилцжээ.  Энэ үеэр прокурорууд Монгол Улсын Эрүүгийн байцаан шийтгэх хуулийн 172 дугаар зүйлд орсон өөрчлөлт, "Монгол Улсын хилийн тухай” шинэчилсэн найруулгатай холбоотойгоор Хилийн 0277 дугаар тусгай анги, 5 заставын хойшлуулашгүй ажиллагаа явуулах эрх бүхий албан тушаалтнууд болон удирдлагуудыг хамруулан сургалт зохион байгуулсан байна.  Сургалтаар хилийн зөрчил, хилийн бус нутгаар үйлдэгддэг гэмт хэрэг, зөрчлийг шалгах, гэмт үйлдлийг илрүүлэх талаар "Хойшлуулашгүй ажиллагаа явуулахад анхаарах асуудлууд” сэдэвт 2 цаг, "Эрүүгийн хуулийн 175, 89, 113 дугаар зүйл даасан гэм хэргүүдийг шалгаж шийдвэрлэхэд анхаарах асуудал” сэдэвт 2 цаг, "Захиргааны зөрчлийг шалгаж шийдвэрлэх ажиллагаа” сэдэвт 2 цагийн сургалтыг явуулжээ. Мөн  иргэдийн дунд түгээмэл үйлдэгддэг Эрүүгийн хуулийн тусгай ангид заасан гэмт хэрэг, зөрчилөөс урьдчилан сэргийлэх, аливаа гэмт хэргийн хохирогч холбогдогч болохоос өөрийгөө хамгаалах, "Гэр бүлийн хүчирхийлэлтэй тэмцэх тухай хууль”-ийг сурталчилан таниулж ахлах прокурор Д.Цогт-Эрдэнэ мэдээлэл, яриа таниулгыг биечлэн зохион байгуулсан байна.  Түүнээс гадна сургалтад хамрагдсан албан хаагч нарт "Бичиг баримт шалгах, тээврийн хэрэгсэл, ачаа тээш, хүний биед үзлэг нэгжлэг хийх, харьяаллын хэрэгт хойшлуулашгүй ажиллагаа явуулах шалган нэтврүүлэхэд бүрдүүлэх материал” гэсэн сэдвээр сургалтыг практик дадлага хэлбэрээр явуулж тухайн материалын бүрдүүлбэрийг үзэж шалган чиглэл зөвлөгөө өгч, сургалтын ач холбогдлыг дүгнэж хэлэлцүүлэг зохион байгуулсан нь үр дүнтэй ажил болжээ. Цаашид прокурорууд Хилийн 0277 дугаар цэргийн ангитай тогтмол хамтран ажиллах талаар нэгдсэн шийдэлд хүрсэн бөгөөд Монгол Улсын Ерөнхий прокурорын 2017 оны үйл ажиллагааны төлөвлөгөөнд тусгагдсаны дагуу гэмт хэргээс урьдчилан сэргийлэх чиглэлээр харъяалах орон нутгийн байгууллагатай хамтран гэмт хэргээс урдчилан сэргийлэх ажлыг эрчимжүүлэхэд анхааран удирдлага зохион байгуулалтын арга хэмжээ аван ажиллахаар болсон байна.