1258 ИРГЭНД ЯРИА ТАНИУЛГА ХИЙЖ, САЛБАР ЗӨВЛӨЛИЙН АЖЛЫГ ШАЛГАЖЭЭ

  1. 2017-04-19
  2. Архив,
  3. 386 уншсан
  4. 1 минут уншина
A- A A+
1258 ИРГЭНД ЯРИА ТАНИУЛГА ХИЙЖ, САЛБАР ЗӨВЛӨЛИЙН АЖЛЫГ ШАЛГАЖЭЭ

Булган аймгийн Прокурорын газраас 2017 онд хийж гүйцэтгэх ажлын төлөвлөгөөнд тусгагдсаны дагуу аймгийн прокуророос баталсан удирдамжаар хяналтын харъяа 15 суманд энэ сарын 10-16-ны өдрүүдэд ажиллажээ. Дээрх ажлын хүрээнд аймгийн Гэмт хэргээс урьдчилан сэргийлэх ажлыг зохицуулах зөвлөл, Хууль зүйн хэлтэс, шүүх, прокурор, цагдаа, шүүхийн шийдвэр гүйцэтгэх алба, мэргэжлийн хяналтын газрын холбогдох албан тушаалтнуудаас бүрдсэн 4 ажлын хэсэг Баян-Агт, Баяннуур, Бугат, Бүрэгхангай, Гурванбулаг, Дашинчилэн, Могод, Орхон, Рашаант, Сайхан, Сэлэнгэ, Тэшиг, Хангал, Хишиг-Өндөр, Хутаг-Өндөр сумдад болон Хялганат тосгоны ард иргэд, ерөнхий боловсролын сургуулийн төгсөх ангийн сурагчид, төрийн болон төрийн бус байгууллагын ажилтан, албан хаагчид зэрэг нийт 1258 хүнд аймгийн хууль хяналтын байгууллагын үйл ажиллагааг сурталчилж, хөгжөөнт цэнгээнт, танин мэдэхүйн "АХА” тэмцээнийг зохион байгуулж, ард иргэдийн санал хүсэлт, гомдлыг хүлээн авчээ.  Аймгийн прокурорын газрын прокуроруудаас сумдад яриа таниулга хийхдээ прокурорын байгууллагын чиг үүрэг, прокурорын хяналтын ажлын онцлог, аймгийн прокурорын газраас 2016 онд хийж гүйцэтгэсэн ажил, Булган аймгийн 2016 оны эрүүгийн нөхцөл байдал, төрийн албан хаагчаас үйдсэн гэмт хэрэг, түүний шалтгаан нөхцөл, Монгол Улсын Их хурлаас шинэчлэн батлан гаргасан "Гэр бүлийн хүчирхийлэлтэй тэмцэх тухай” хуулийн талаар ард иргэдэд мэдээлж, "Прокурорын байгууллагын талаарх олон нийтийн санал бодол” нэртэй санал асуулгын хуудсыг бөглүүлж, санал хүсэлтийн дагуу дүн шинжилгээ хийн ажиллахаар болжээ. Мөн сумдын Гэмт хэргээс урьдчилан сэргийлэх ажлыг зохицуулах орон тооны бус зөвлөлийн 2016 он, 2017 оны эхний 3 сарын байдлаар хийж гүйцэтгэсэн ажил, түүний үр дүн, хэсгийн төлөөлөгчөөс хорихоос өөр төрлийн ял шийтгүүлсэн, ял хойшлогдсон, тэнсэж харгалзсан ялтанд хяналт тавих ажиллагаа хууль журмын дагуу явагдаж байгаа эсэхийг тус тус шалгасан байна. Сум, тосгонд ажиллах явцад гэмт хэргээс урьдчилан сэргийлэх агуулга бүхий 1300 ширхэг танилцуулга хуудсыг ард иргэдэд тарааж, сумдын Гэмт хэргээс урьдчилан сэргийлэх ажлыг зохицуулах орон тооны бус зөвлөл, хэсгийн төлөөлөгч нарт ажил сайжруулах талаар зөвлөмж өгч, сумдын Гэмт хэргээс урьдчилан сэргийлэх ажлыг зохицуулах орон тооны бус зөвлөлд прокурорын мэдэгдэл хүргүүлж, биелэлтэд нь хяналт тавин ажиллахаар шийдвэрлэжээ.