ГЭМТ ХЭРЭГ ЗӨРЧИЛД ХОЛБОГДОХООС УРЬДЧИЛАН СЭРГИЙЛЭХ ЗОРИЛГООР СУРГАЛТ ХИЙЖЭЭ

Баянхонгор аймгийн Прокурорын газраас аймгийнхаа Цагдаагийн газартай хамтран 4 дүгээр сарын 24-ний өдөр шүүхээс хорих ялыг тэнссэн, хорих ял эдлэхээс хугацааны өмнө тэнсэн суллагдсан, ял хойшлогдож захиргааны хяналтанд авагдсан ялтнуудад хууль эрх зүйн болон хөдөлмөр халамж үйлчилгээний чиглэлээр мэдээлэл олгох, дахин гэмт хэрэг зөрчилд холбогдохоос урьдчилан сэргийлэх зорилгоор сургалт зохион байгуулсан байна.  

Сургалтанд захиргааны хяналтанд байгаа нийт 74 ялтан хамрагджээ. Сургалтаар аймгийн Цагдаагийн газраас "Зөрчлийн тухай хууль”, "Гэр бүлийн хүчирхийлэлттэй тэмцэх тухай хууль”, "Архидан согтуурахтай тэмцэх тухай хууль”, "Хөдөлгөөний аюулгүй байдлыг хангах тухай хууль” тогтоомжоор мэдээлэл хийсэн байна. Түүний дараа  Хүний эрхийн үндэсний комиссын мэргэжилтэн Б.Содонцэцэг "Хүний эрх” сэдвээр, Хөдөлмөр, халамж үйлчилгээний газрын мэргэжилтэн Г.Сайханцэцэг, Н.Одгэрэл нараас "Ажил мэргэжлийн чиг баримжаа”, "Хөдөлмөр эрхлэлтийг дэмжих төсөл хөтөлбөр” сэдвүүдээр сургалт явуулж, ялтнуудаас дахин гэмт хэрэг зөрчилд холбогдохгүй байх талаар баталгаа гаргуулж, гэмт хэрэг түүнээс гарах үр дагаварыг харуулсан богино хэмжээний кино үзүүлэх зэрэг арга хэмжээг зохион байгуулжээ.