“ЗАМ ТЭЭВРИЙН ОСЛООС УРЬДЧИЛАН СЭРГИЙЛЭХ НЬ” СЭДЭВТ СУРГАЛТ, ЗӨВЛӨГӨӨН БОЛЛОО

  1. 2017-05-23
  2. Архив,
  3. 988 уншсан
  4. 1 минут уншина
A- A A+
“ЗАМ ТЭЭВРИЙН ОСЛООС УРЬДЧИЛАН СЭРГИЙЛЭХ НЬ” СЭДЭВТ СУРГАЛТ, ЗӨВЛӨГӨӨН БОЛЛОО
Сэлэнгэ аймгийн прокурорын газраас санаачлан Тээврийн прокурорын газартай хамтран   прокурорууд болон цагдаагийн газрын нийт бие бүрэлдэхүүнийг оролцуулан  "Зам тээврийн ослоос урьдчилан сэргийлэх нь” сэдэвт зөвлөгөөнийг зохион байгууллаа.  Зөвлөгөөнийг нээж аймгийн прокурор Ж.Мөнхжаргал, Тээврийн прокурор Ү.Содномцог нар үг хэлсний дараа тээврийн хэрэгслийн хөдөлгөөний аюулгүй байдлын эсрэг гэмт хэргийг шалгаж шийдвэрлэхэд учирч буй бэрхшээл, анхаарах асуудлын талаарх сургалт эхэлжээ. Сургалтын үеэр Сэлэнгэ аймгийн Гэмт хэргээс урьдчилан сэргийлэх ажлыг зохицуулах зөвлөлийн дарга  Г.Бямбаа зөвлөгөөнтэй холбогдуулж дараах байр суурийг илэрхийлсэн байна. Тэрээр хэлэхдээ "Сэлэнгэ аймгийн хувьд 24 цагийн ажиллагаатай авто боомт ажиллаж байгаатай холбогдуулан автомашинаар зорчих иргэдийн тоо, хөдөлгөөн ихэсч байгаагаас үүдэн зам тээврийн осол нэмэгдэх хандлагатай болсон. Тиймээс өнөөдрийн зохион байгуулж байгаа зөвлөгөөн цаг үеэ олсон ач холбогдолтой арга хэмжээ боллоо. Цаашид аймгийн хууль хяналтын байгууллагаас зохион байгуулж байгаа арга хэмжээг дэмжин ажиллах болно" гэж хэлсэн байна. Зөвлөгөөнд Тээврийн прокурор, хууль итгэмжит цаазын зөвлөх Ү.Содномцог, орлогч прокурор Д.Сарантуяа, хяналтын прокурор Ц.Мөнхжаргал, Цагдаагийн Ерөнхий газрын Замын Цагдаагийн албаны Захиргаа удирдлагын хэлтсийн дарга, цагдаагийн дэд хурандаа С.Жавхлантбаатар, Жижүүрийн шуурхай удирдлагын хэлтсийн дарга, цагдаагийн дэд хурандаа З.Наранбаатар, Шүүхийн шинжилгээний үндэсний хүрээлэнгийн Автотехникийн шинжилгээний хэсгийн ахлах шинжээч, цагдаагийн дэслэгч Г.Цэндсүрэн нар  болон бусад албаны хүмүүс оролцож үг хэлж харилцан саналаа солилцжээ.
Зөвлөгөөний дараа Тээврийн прокурорын газрын орлогч прокурор Д.Сарантуяа "Тээврийн хэрэгслийн хөдөлгөөний аюулгүй байдал, ашиглалтын  журмын эсрэг гэмт хэргийг шалгах, нотлох баримтыг цуглуулах, бэхжүүлэхэд анхаарах асуудлууд” сэдвээр, Шүүхийн шинжилгээний үндэсний хүрээлэнгийн Автотехникийн шижилгээний хэсгийн ахлах шинжээч, цагдаагийн дэслэгч Г.Цэндсүрэн "Хэргийн газрын үзлэгийн явцад ул, мөрийг бэхжүүлж авах” сэдвээр тус тус сургалт явуулсны зэрэгцээ Тээврийн прокурорын газрын хяналтын прокурор Ц.Мөнхжаргал  "Шүүхээс эрүүгийн хэргийг нэмэлт хэрэг бүртгэлт, мөрдөн байцаалтанд буцааж буй шалтгаан нөхцөл”-ийн талаар жишээ баримттайгаар мэдээлэл хийсэн нь үр дүнтэй болжээ. Дээрх арга хэмжээний явцад Замын Цагдаагийн албаны Захиргаа удирдлагын хэлтсийн дарга, цагдаагийн дэд хурандаа н.Жавхлантбаатар аймгийн Цагдаагийн газрын Замын цагдаагийн тасгийн албан хаагчдын албан хэрэгцээнд  "kenwood ТК-2217,  kenwood KSC 35S,  kenwood KSC 35” загварын богино долгионы гар станц 4 ширхэг, замын цагдаагийн зохицуулагчийн алаг дохиур 5 ширхэгийг тус тус гардуулан өгсөн  байна. Сургалтанд  оролцсон прокурор, цагдаагийн алба хаагч нар харилцан ярилцаж үр дүнтэй, ач холбогдолтой зөвлөгөөн, сургалт  боллоо гэж дүгнэжээ.  Нэмэлт мэдээллийг хүргэхэд, Прокурорын байгууллагын удирдах ажилтны  нэгдсэн зөвлөгөөн дээр Монгол Улсын Ерөнхий прокурор "Улсын яллагчийн мэтгэлцэх ур чадварыг дээшлүүлэхэд чиглэсэн байгууллагын дотоод сургалтыг үр өгөөжтэй болгох" талаар өгсөн үүргийг хэрэгжүүлж ажиллах зорилгоор Сэлэнгэ аймгийн прокурорын газар прокурор,ажилтнууд, хэрэг бүртгэгч, мөрдөн байцаагч нарт  сургалтуудыг үе шаттайгаар энэ мэтчилэн зохион байгуулж ажиллаж байгаа юм байна.