НИЙСЛЭЛИЙН ХЭМЖЭЭНД ХУУЛИЙН БАЙГУУЛЛАГЫН ХОЁРДУГААР БҮСИЙН НЭГДСЭН СУРГАЛТ ӨНӨӨДӨР ЭХЭЛЛЭЭ

  1. 2017-06-12
  2. Архив,
  3. 1047 уншсан
  4. 1 минут уншина
A- A A+
НИЙСЛЭЛИЙН ХЭМЖЭЭНД ХУУЛИЙН БАЙГУУЛЛАГЫН ХОЁРДУГААР БҮСИЙН НЭГДСЭН СУРГАЛТ ӨНӨӨДӨР ЭХЭЛЛЭЭ
УИХ-аар шинэчлэн батлагдсан "Эрүүгийн хууль, Эрүүгийн хэрэг хянан шийдвэрлэх тухай хууль болон Зөрчлийн тухай хууль, Зөрчил шалган шийдвэрлэх"  тухай хуулиудаар нийслэлийн хэмжээнд хуулийн байгууллагын нэгдсэн сургалтыг нийт 9 бүст бүсчлэн зохион байгуулж байгаа бөгөөд 2 дугаар бүсийн сургалт Тагнуулын Ерөнхий газрын хурлын  танхимд өнөөдөр эхэллээ. Энэхүү сургалтын нээлтийн үйл ажиллагаанд Улсын Ерөнхий прокурорын орлогч, Төрийн хууль цаазын шадар зөвлөх Г.Эрдэнэбат, УЕП-ын туслах прокурор, УЕПГ-ын Тамгын газрын дарга Ц.Арвинбуудай, Нийслэлийн прокурор, хууль цаазын итгэмжит зөвлөх Д.Баярмагнай, Цагдаагийн Ерөнхий газрын тэргүүн дэд дарга П.Батбаатар, ЦЕГ-ын дэд дарга М.Лувсандорж, ЦЕГ-ын дэд дарга Ч.Болдбаатар,  ЦЕГ-ын Захиргаа удирдлагын газрын дарга П.Оростогоо нар оролцлоо. Сургалтад  Улсын Ерөнхий прокурорын газрын  45 прокурор, Нийслэлийн прокурорын газрын 40 прокурор, Цагдаагийн Ерөнхий газар, Нийслэл, Дүүргийн цагдаагийн байгууллагын дарга, албан хаагчдаас бүрдсэн 110 хүн, Улаанбаатар хотын захирагчийн ажлын албаны 10 албан хаагчдаас бүрдсэн нийт 205 төрийн алба хаагч сургалтад оролцож байна. Сургалтыг зохион байгуулж буй сургагч багш нарын баг бүрэлдэхүүний талаар товч танилцуулахад, Сургалтын багийн ахлагчаар Улсын Ерөнхий прокурорын орлогч, Төрийн хууль цаазын шадар зөвлөх Г.Эрдэнэбат ажиллаж байна. Харин сургагч багшаар, ЦЕГ-ын Мөрдөн байцаах албаны дарга, цагдаагийн хурандаа Д.Наранбаатар, Сүхбаатар дүүргийн прокурорын орлогч Ц.Хашбаатар, Баянгол дүүргийн прокурорын орлогч Т.Мөнхжаргал, Баянзүрх дүүргийн прокурорын орлогч А.Бямбацэемаа, Замын цагдаагийн албаны урьдчилан сэргийлэх хэлтсийн ахлах мэргэжилтэн Ж.Энхбат, ЦЕГ-ын Хэрэг бүртгэх албаны дүн шинжилгээ, үнэлгээ, хяналт шалгалтын хэлтсийн ахлах мэргэжилтэн Г.Эрдэнэбаатар, Чингэлтэй дүүрэг дэх цагдаагийн 2 дугаар хэлтсийн нийтийн хэв журам хамгаалах газрын ахлах байцаагч А.Ганбаяр нарын бүрэлдэхүүнтэй сургалтын баг өнөөдрөөс эхлэн энэ сарын 16-ны өдрийг хүртэл ажлын 5 хоногийн хугацаанд шинэ хуулийн сургалтыг зохион байгуулж ажиллах юм байна. Тус сургалт нь 2017 оны 07 дугаар сарын 01-ний өдрөөс хэрэгжиж эхлэх Эрүүгийн хууль, Зөрчлийн тухай, Эрүүгийн хэрэг хянан шийдвэрлэх тухай, Зөрчил шалган шийдвэрлэх тухай, Шүүхийн шийдвэр гүйцэтгэх тухай, Прокурорын тухай хуулиуд батлагдсантай холбогдуулан уг хуулиудын үзэл баримтлал, шинэ зохицуулалтын талаар холбогдох хуулийн байгууллагын албан тушаалтнуудад мэдлэг олгох, хуулийн үзэл баримтлалыг таниулах зорилготой ажээ.