НИЙСЛЭЛИЙН ЕРӨНХИЙ ПРОКУРОРЫН ДЭРГЭДЭХ ЗӨВЛӨЛИЙН ХУРЛААР ГЭМТ ХЭРГЭЭС УРЬДЧИЛАН СЭРГИЙЛЭХ АЖЛЫН ДҮНГ ХЭЛЭЛЦЛЭЭ

  1. 2017-09-13
  2. Архив,
  3. 1011 уншсан
  4. 1 минут уншина
A- A A+
НИЙСЛЭЛИЙН ЕРӨНХИЙ ПРОКУРОРЫН ДЭРГЭДЭХ ЗӨВЛӨЛИЙН ХУРЛААР ГЭМТ ХЭРГЭЭС УРЬДЧИЛАН СЭРГИЙЛЭХ АЖЛЫН ДҮНГ ХЭЛЭЛЦЛЭЭ
Нийслэлийн прокурорын газраас 2017 он гарсаар есдүгээр сарын байдлаар Гэмт хэргээс урьдчилан сэргийлэх чиглэлээр хийж гүйцэтгэсэн ажил, түүний үр дүнг Нийслэлийн ерөнхий прокурорын дэргэдэх зөвлөлийн хурлаар өчигдөр хэлэлцжээ. Зөвлөлийн хурлаар прокурорууд Нийслэлийн ерөнхий прокурорын баталсан хуваарийн дагуу гэмт хэргээс урьдчилан сэргийлэх чиглэлээр ерөнхий боловсролын болон их, дээд сургууль, бусад газруудад нийт 44 удаагийн яриа, таниулга явуулж, 47 удаа прокурорын мэдэгдэл бичсэн байна. Мөн тус прокурорын газрын хяналтанд сүүлийн 3 жилийн байдлаар Эрүүгийн хуулийн 188, 192, 193, 194, 195, 196 дугаар зүйлд заасан "Мансууруулах болон сэтгэцэд нөлөөлөх эм, бэлдмэл, бодистой холбоотой гэмт хэргийн гаралт, шийдвэрлэлт, үйлдэгдэн гарч буй шалтгаан нөхцөл”-ийг судалж, судалгааны мөрөөр сургалтын материал гарган, үйл ажиллагаандаа ашиглаж байгаа ажээ. Дээрх судалгааны дүнгийн талаар "ЕТV” телевизэд ярилцлага өгсөнөөс гадна мансууруулах болон сэтгэцэд нөлөөт эм, бэлдмэл, бодисын хор хөнөөлийн талаар Улсын Ерөнхий прокурорын газраас бэлтгэн хүргэдэг "Прокурорын мэдээлэл” нэвтрүүлэг, "Сүлд” телевиз, Монголын Үндэсний Олон Нийтийн Телевизийн "Хар тамхи-Цагаан тахал" шууд нэвтрүүлэгт оролцон ярилцлага өгчээ. Мөн  Монголын Үндэсний олон нийтийн телевизийн "Эрх зүйн хөтөч” нэвтрүүлгээр "Хорихоос өөр төрлийн ял, Хорих ялаас хугацааны өмнө тэнсэн суллах шүүх хурлын явц болон түүний дараах прокурорын хяналт”-ын талаар, "Захиргааны хариуцлагын тухай хууль, "Прокурорын байгууллагын чиг үүрэг, Захиргааны зөрчил” сэдвүүдээр мэдээлэл хүргэжээ.  Түүнээс гадна "Зууны мэдээ” сонины хууль эрх зүйн буланд "Зөрчлийг бага, багаар үйлдсээр гэмт хэрэгт холбогддог” сэдвээр тус тус гэмт хэргээс урьдчилан сэргийлэх чиглэлээр ярилцлага өгсөн нь тодорхой үр өгөөжтэй ажил болсон гэж Нийслэлийн ерөнхий прокурорын дэргэдэх зөвлөлийн хурлаар дүгнэсэн байна. Он гарсаар Нийслэлийн прокурорын газраас хууль хяналтын байгууллагуудын албан хаагчдад зориулсан сургалтуудыг үе шаттайгаар зохион байгуулжээ. Тухайн сургалтуудын заримаас дурдихад, Нийслэлийн Онцгой байдлын газар, Нийслэлийн байгаль орчны газрын гал түймрийн хяналтын, гамшгаас хамгаалах, байгаль орчны хяналтын улсын байцаагч, Нийслэлийн дүүргүүдийн ногоон бүсийн байгаль хамгаалагч нарын нийт 150 орчим зөрчлийн хэрэг бүртгэлтийн ажиллагаа явуулах эрх бүхий албан тушаалтнуудыг хамруулан сургалт зохион байгуулж, уг сургалтаар зөрчил шалган шийдвэрлэх ажиллагаа болон шинэчлэн батлагдсан хуулиудыг хэрэгжүүлэх хүрээнд анхаарах асуудлууд, Улсын Ерөнхий прокуророос баталсан тушаал, журам, холбогдох эрх зүйн баримтуудыг хэрхэн зөв хэрэглэх талаар мэдлэг, мэдээллийг өгсөн байна. Нийслэлийн прокурорын газраас 9 сарын байдлаар гэмт хэргээс урьдчилан сэргийлэх чиглэлээр хийсэн ажлыг өмнөх оны мөн үетэй харьцуулбал, яриа, таниулга 92 хувиар, хэвлэлд өгсөн мэдээ, мэдээлэл 62 хувиар тус тус өссөн эерэг ажлын дүн гарчээ. Цаашид гэмт хэргээс урьдчилан сэргийлэх ажлын хүрээнд Нийслэлийн Цагдаагийн газрын Гэмт хэргээс урьдчилан сэргийлэх хэлтэс, Эрүүгийн цагдаагийн албаны Хар тамхитай тэмцэх газартай хамтран шалгалт явуулахаар төлөвлөн ажиллаж эхэлжээ.