БУЛГАН АЙМГИЙН ПРОКУРОРЫН ГАЗАР ХАМТАРСАН СУРГАЛТ ЗОХИОН БАЙГУУЛАВ

  1. 2017-09-18
  2. Архив,
  3. 692 уншсан
  4. 1 минут уншина
A- A A+
БУЛГАН АЙМГИЙН ПРОКУРОРЫН ГАЗАР ХАМТАРСАН СУРГАЛТ ЗОХИОН БАЙГУУЛАВ
Булган аймгийн прокурорын газраас аймгийнхаа Цагдаагийн газрын мөрдөн байцаах тасаг, эрүүгийн цагдаагийн тасгийн мөрдөгч нартай хамтарсан уулзалт, зөвлөгөөнийг зохион байгуулжээ. Хамтарсан уулзалт, зөвлөгөөнөөр Монгол Улсын Их хурлаас шинэчлэн батлагдсан Эрүүгийн хууль, Эрүүгийн хэрэг хянан шийдвэрлэх тухай хууль болон Улсын Ерөнхий прокурорын тушаалаар батлагдсан заавар, журмын хэрэгжилтийн асуудлыг авч хэлэлцсэн байна. Энэ үеэр Тухайлбал тус прокурорын газрын ерөнхий прокурорын орлогч, хууль цаазын ахлах зөвлөх Ж.Болорпүрэв нь Монгол Улсын Ерөнхий прокурорын 2017 оны 06 сарын 27-ны өдрийн А/59 дугаар тушаалын хавсралтаар баталсан " Мөрдөн шалгах ажиллагааны эрх зүйн хэлбэрийн жагсаалт, загвар”-ын хэрэгжилт буюу прокурор, мөрдөгч нараас үйлдэж байгаа зарим эрх зүйн хэлбэрийн хууль зүйн үндэслэл, агуулгыг шалгаж илэрсэн зөрчил, дутагдал цаашид гаргахгүй таслан зогсоох, анхаарах асуудлын талаар хамтарсан уулзалт, зөвлөгөөнд оролцсон нийт мөрдөгч нарт үүрэг чиглэл, өгчээ. Хамтарсан уулзалт, зөвлөгөөнөөс дээрх шалгалтын дүнг үндэслэн аймгийн цагдаагийн газраас сумдад ажиллаж буй нийт мөрдөгч нарт ажил сайжруулах, анхаарах асуудлын талаар чиглэл хүргүүлэхээр шийдвэрлэсэн байна. Мөн шалгалтын дүнг Аймгийн ерөнхий прокурорын дэргэдэх зөвлөлийн хурлаар хэлэлцүүлэн, тус зөвлөлөөс гарсан шийдвэрийн дагуу прокуроруудад болон мөрдөгч нарт Монгол Улсын Ерөнхий прокурорын 2017 оны 08 сарын 22-ны өдрийн А/96 дугаар тушаалаар баталсан "Мөрдөн шалгах ажиллагаанд тавих прокурорын хяналтын ажлын аргачилсан заавар” сэдвээр сургалт зохион байгуулж, хууль болон Улсын Ерөнхий прокурорын тушаалын биелэлтийг нэг мөр хангаж, хэрэгжүүлж ажиллах үүргийг өгчээ.  Түүнчлэн тус хамтарсан уулзалтаар Монгол Улсын Их хурлаас шинэчлэн батлагдсан Эрүүгийн хууль, Эрүүгийн хэрэг хянан шийдвэрлэх тухай хууль, Зөрчлийн тухай хууль, Зөрчил шалган шийдвэрлэх тухай хуулийг тус орон нутагт хэрэгжүүлэхэд учирч буй бэрхшээл, бусад хүчин төгөлдөр үйлчилж байгаа хууль тогтоомжуудтай зөрчилдөж байгаа эсэх асуудлаар санал солилцож, прокурор, мөрдөгч нараас гарсан саналыг нэгтгэн дүгнэж дээд шатны газарт танилцуулахаар шийдвэрлэжээ.