Дорнод аймгийн сумдад гэмт хэргээс урьдчилан сэргийлэх ажил зохион байгуулжээ

Дорнод аймгийн Гэмт хэргээс урьдчилан сэргийлэх ажлыг зохицуулах зөвлөлийн 2017 оны төлөвлөгөө, аймгийн прокурорын газрын 4 дүгээр улирлын төлөвлөгөөний дагуу Аймгийн ерөнхий прокуророор ахлуулсан орон нутгийн хууль хяналтын 6 байгууллагын 27 гишүүнтэй ажлын хэсэг 2017 оны 11 дүгээр сарын 07-ноос 2017 оны 11 дүгээр 17-ны өдрүүдэд тус аймгийн Цагаан-Овоо, Баян-Уул, Сэргэлэн, Гурванзагал, Дашбалбар, Чулуунхороот, Чойбалсан сумдад гэмт хэргээс урьдчилан сэргийлэх ажлыг зохион байгуулжээ. Орон нутгийн хууль хяналтын байгууллагууд нэгдсэн бүрэлдэхүүнтэйгээр гэмт хэргээс урьдчилан сэргийлэх ажлыг 3 дахь жилдээ уламжлал болгон зохион байгуулж  байгаа бөгөөд энэ удаагийн ажлаар  шинээр батлагдсан хуулиудын талаар сумдын иргэдэд мэдээлэл өгч, сургалт, уулзалтанд оролцсон иргэд, албан тушаалтнуудад зориулан урлагийн тоглолт зохион байгуулсан байна.  

Аймгийн ерөнхий прокуророос сумдын иргэд, эрх бүхий албан тушаалтнуудад шинээр батлагдсан хуулинд  тусгалаа олсон хүүхдийн эсрэг, гэр бүлийн хүчирхийлэлийн эсрэг, мал хулгайлах, байгаль орчны эсрэг гэмт хэрэг, зөрчлийн талаар мэдээлэл хийжээ. Энэ арга хэмжээний үеэр хяналтын прокурорууд сумын гэмт хэргээс урьдчилан сэргийлэх ажлыг зохицуулах салбар зөвлөлийн ажлыг газар дээр нь шалгаж, зааварчилга өгөх, хөдөө орон нутагт ажиллаж буй эрх бүхий албан тушаалтнуудад Зөрчил шалган шийдвэрлэх тухай хуулийг хэрхэн ойлгож нэг мөр хэрэгжүүлэх, дээд шатны байгууллагуудаас батлан гаргасан тушаал, журам, эрх зүйн хэлбэрийн загваруудыг зөв бичиж хэрэглэх талаар  сургалт хийсэн нь үр дүнтэй ажил болсон байна. Цаашид тус ажлын хэсэг энэ оны 12 дугаар сарын эхний 10 хоногт багтаан Матад, Халхгол, Хөлөнбуйр, Булган сумдад ажиллан, улмаар бүх сумдад ажилласан ажлын үр дүн, сум орон нутгийн нөхцөл байдлыг аймгийн гэмт хэргээс урьдчилан сэргийлэх зохицуулах зөвлөлд танилцуулан, 2018 онд хийх ажлын төлөвлөгөөнд тодорхой саналуудыг тусган   ажиллахаар төлөвлөж байна.