ЗӨРЧИЛ ШАЛГАН ШИЙДВЭРЛЭХ ЭРХ БҮХИЙ БАЙГУУЛЛАГУУДТАЙ ХАМТАРСАН УУЛЗАЛТ, ЗӨВЛӨГӨӨНИЙГ ЗОХИОН БАЙГУУЛЛАА

  1. 2017-11-24
  2. Архив,
  3. 542 уншсан
  4. 1 минут уншина
A- A A+
ЗӨРЧИЛ ШАЛГАН ШИЙДВЭРЛЭХ ЭРХ БҮХИЙ БАЙГУУЛЛАГУУДТАЙ ХАМТАРСАН УУЛЗАЛТ, ЗӨВЛӨГӨӨНИЙГ ЗОХИОН БАЙГУУЛЛАА
 Булган аймгийн прокурорын газраас санаачлан 2017 оны 11 дүгээр сарын 21-ний өдөр "Хяналтын харъяа зөрчил шалган шийдвэрлэх эрх бүхий байгууллагуудтай хамтарсан уулзалт, зөвлөгөөнийг зохион байгуулсан байна. Хамтарсан уулзалт зөвлөгөөнөөр Булган аймгийн хэмжээнд зөрчлийн хэрэг бүртгэх эрх бүхий байгууллага болох Цагдаагийн газар, Мэргэжлийн хяналтын газар, Татварын хэлтэс, Шүүхийн шийдвэр гүйцэтгэх газар, Тагнуулын хэлтэс, Нийгмийн даатгалын хэлтэс, Архивын тасаг, Онцгой байдлын газар, Улсын бүртгэлийн хэлтсийн 70 орчим эрх бүхий албан тушаалтнуудыг оролцуулан Монгол Улсын Их Хурлаас баталсан шинэчлэн найруулсан Зөрчлийн болон Зөрчил шалган шийдвэрлэх хуулийг нэг мөр хэрэгжүүлж, мөрдүүлэх хүрээнд зарим асуудлуудыг хэлэлцэж санал солилцжээ.  Хамтарсан уулзалт, зөвлөгөөний хөтөлбөрийн дагуу тус аймгийн прокурорын газрын хяналтын прокурор Ц.Сувдаа "Зөрчил шалган шийдвэрлэх ажиллагаа, түүнд тавих прокурорын хяналт”;   Аймгийн Цагдаагийн газрын Хэрэг бүртгэх тасгийн ахлах хэрэг бүртгэгч, хошууч Ж.Батдорж "Зөрчил шалган шийдвэрлэх хуулийн хэрэгжилт, анхаарах асуудал, шийдвэрлүүлэх асуудал”, Аймгийн Мэргэжлийн хяналтын  газрын хэлтсийн дарга Т.Хувьзаяа "Зөрчил шалган шийдвэрлэх хуулийн хэрэгжилт, цаашид анхаарч ажиллах асуудлууд” зэрэг сэдвээр тус тус мэдээлэл хийж, 2017 оны 07 дугаар сарын 01-ний өдрөөс шинээр мөрдөгдөж буй хуулийн хүрээнд хийж гүйцэтгэсэн ажил, үр дүнгийн талаар танилцуулсан байна. Мөн энэ үеэр эрх бүхий албан тушаалтнууд Зөрчлийн хууль, зөрчил шалган шийдвэрлэх ажиллагааны явцад тухайн орон нутагт гарч буй хүндрэл, бэрхшээлтэй асуудлыг хэлэлцэж шийдвэрлэх, хяналтын ажлыг үр дүнтэй байхад анхаарах асуудлын талаар харилцан санал солилцсоны үр дүнд хуулийн хэрэгжилтийг хангахад анхаарах асуудал, зарим зүйл заалтын хүрээнд нэгдсэн ойлголтод хүрэх зэргээр хамтарсан уулзалт, зөвлөгөөн үр дүнтэй болсон байна. Хамтарсан уулзалт, зөвлөгөөнөөс байгууллагын хамтын ажиллагаа, хариуцлагыг нэмэгдүүлэх, гаргасан санал хүсэлтүүдийг нэгтгэн шийдвэрлэхээс гадна аймгийн Прокурорын газраас харъяа хяналтын зөрчлийн хэрэг бүртгэх эрх бүхий байгууллагад Зөрчлийн тухай хууль, Зөрчил шалган шийдвэрлэх тухай хуулийг хэрэгжүүлэхэд гарч буй зөрчил, цаашид анхаарах асуудлын талаар "Зөвлөмж” боловсруулж хүргүүлэхээр шийдвэрлэжээ.