“ГЭМТ ХЭРЭГ, ЗӨРЧЛӨӨС УРЬДЧИЛАН СЭРГИЙЛЭХЭД ИРГЭД, БАЙГУУЛЛАГА, АЖ АХУЙ НЭГЖИЙН ҮҮРЭГ” СЭДЭВТ ЗӨВЛӨГӨӨН БОЛЛОО

Багануур дүүргийн прокурорын газрын Ерөнхий прокурор болон тус дүүргийн Гэмт хэргээс урьдчилан сэргийлэх ажлыг зохицуулах салбар зөвлөлийн дарга нарын баталсан хөтөлбөрийн дагуу "Гэмт хэрэг, зөрчлөөс урьдчилан сэргийлэхэд иргэд, байгууллага, аж ахуй нэгжийн үүрэг” сэдэвт зөвлөгөөнийг зохион байгууллаа. Зөвлөгөөнд аж ахуй нэгж байгууллагуудын удирдлага, хуулийн зөвлөх, гэмт хэргээс урьдчилан сэргийлэх ажил хариуцсан ажилтнууд, хорооны иргэдээс гадна тус дүүргийн Иргэдийн Төлөөлөгчдийн Хурлын зарим төлөөлөгчид оролцов. Зөвлөгөөнийг тус дүүргийн ИТХ Тэргүүлэгчдийн дарга, Гэмт хэргээс урьдчилан сэргийлэх ажлыг зохицуулах салбар зөвлөлийн дарга С.Даваасүрэн нээж үг хэллээ. Хөтөлбөрийн дагуу "Эрүүгийн хууль, Эрүүгийн хэрэг хянан шийдвэрлэх тухай хууль, Зөрчлийн тухай хууль, Зөрчил шалган шийдвэрлэх тухай” хуулиудаар дүүргийн Ерөнхий прокурорын орлогч М.Гэрэлбадрах, эрүүгийн нөхцөл байдлын талаар Цагдаагийн хэлтсийн хэрэг бүртгэх, мөрдөн байцаах тасгийн дарга, цагдаагийн ахмад Г.Ганзориг, "Гэмт хэргээс урьдчилан сэргийлэх ажилд иргэн, аж ахуй нэгж байгууллагын оролцоо тэдгээрийн эрх үүрэг”-ийн тухай цагдаагийн хэлтсийн байцаагч цагдаагийн ахмад Т.Алтанцэцэг, Бага насны хүүхдийн гэмт хэргээс урьдчилан сэргийлэх, дүүрэгт хүүхэд хамгааллын чиглэлээр хийгдэж буй ажлын талаарх мэдээллийг Гэр бүл хүүхэд залуучуудын хэлтсийн дарга Т.Ганзориг нар тус тус мэдээлэл хийлээ. Зөвлөгөөний төгсгөлд иргэд, байгууллага, аж ахуйн нэгжийн удирдлага, албан тушаалнуудын тавьсан асуулт, санал шүүмжлэлд холбогдох байгууллагын удирдлагууд хариулт, тайлбар өгч Гэмт хэргээс урьдчилан сэргийлэх ажлын чиглэлээр 2018 онд хэрэгжүүлэх ажлын төлөвлөгөөнд тусгах ажлын талаар иргэдээс гаргасан  санал, шүүмжлэлүүдийг  хүлээн авсан юм.