ТЭЭВРИЙН ПРОКУРОРЫН ГАЗАРТ ИХ ЗАСВАРЫН АЖИЛ ХИЙГДЭЖ, ПРОКУРОР, АЖИЛТНУУДЫН АЖИЛЛАХ НӨХЦӨЛ БОЛОМЖ ХАНГАГДЖЭЭ

  1. 2018-01-12
  2. Архив,
  3. 2942 уншсан
  4. 1 минут уншина
A- A A+
ТЭЭВРИЙН ПРОКУРОРЫН ГАЗАРТ ИХ ЗАСВАРЫН АЖИЛ ХИЙГДЭЖ, ПРОКУРОР, АЖИЛТНУУДЫН АЖИЛЛАХ НӨХЦӨЛ БОЛОМЖ ХАНГАГДЖЭЭ

 

Тээврийн прокурорын газрын конторын барилгад их засварын ажил хийгдэж, прокурор, ажилтнуудын ажиллах нөхцөл боломж хангагджээ. Тус прокурорын газрын конторын барилга нь 1953  онд баригдсан бөгөөд Тээврийн прокурорын газар 1990  оноос тус  байшинд байрлаж, үйл ажиллагаа явуулж байгаа юм. Тээврийн прокурорын газраас хүсэлт тавьсны дагуу "Улаанбаатар төмөр зам" хувь нийлүүлсэн нийгэмлэгээс засварын ажлын төсөв, хөрөнгийг шийдэж өгснөөр их засварын ажил хийгдлээ. Засварын ажлаар конторын үүд хэсэг, 1,2 дугаар давхрын коридор, өрөөнүүдийн хана, тааз, шалыг засаж, хаалгыг сольсон байна. Мөн уулзалтын өрөө, хурлын танхим, номын сан, прокурор ажилтны цайны өрөө зэргийг шинээр гаргаж, тохижуулжээ.  Барилгын их засварын ажил дууссантай холбогдуулан өнөөдөр Улсын Ерөнхий прокурорын Зөвлөлийн гишүүд болон Нийслэл, Дүүргийн прокурорын газрын Ерөнхий прокурор нар тус прокурорын газрын үйл ажиллагаатай танилцав.

Бүгд Найрамдах Монгол Ард Улсын Сайд нарын Зөвлөлийн 1955 оны 09 дүгээр сарын 06-ны өдрийн хуралдаанаас гаргасан 422 тоот тогтоолоор Тээврийн прокурорын газар нь анх байгуулагдсан бөгөөд Улаанбаатар төмөр замын тосгонд төмөр замын төв буудлын хойд талд байрлах орон сууцны 4 дүгээр байранд байрлаж, 1955 оны 10 дугаар сарын 01-ний өдөр ажлаа эхэлснээр тус прокурорын газрын түүхийн хуудас нээгдсэн байна. Төмөр замын прокурорын газар байгуулагдсанаас хойш 38 жил үйл ажиллагаа явуулахдаа Улаанбаатар төмөр зам хувь нийлүүлсэн нийгэмлэгийн хэмжээнд хууль ёсны биелэлтэд тавих хяналтыг хэрэгжүүлэн ажиллаж ирсэн байна. Монгол Улсын Их хурлын 1993 оны 07 дугаар сарын 09-ний өдрийн 59 дүгээр тогтоолын 3-р хавсралтад зааснаар хяналт тавих объектыг өргөжүүлэн Улаанбаатар төмөр зам дахь Цагдаагийн хэлтэс, Замын цагдаагийн газар, Иргэний  тээврийн Цагдаагийн хэлтсийн хэрэг бүртгэх, мөрдөн байцаах болон захиргааны зөрчлийн хэрэг бүртгэх ажиллагаанд дагнан хяналт тавих Тээврийн прокурорын газар болгон шинэчлэн байгуулжээ. Одоо тус прокурорын газарт прокурор 15, прокурорын туслах болон захиргаа үйлчилгээний ажилтан 16  ажиллаж , Улаанбаатар төмөр зам дахь Цагдаагийн хэлтэс, Замын цагдаагийн газар, Иргэний агаарын тээврийн Цагдаагийн хэлтсийн хэрэг бүртгэх, мөрдөн байцаах болон захиргааны зөрчлийн хэрэг бүртгэх ажиллагаанд дагнан хяналт тавин, ажиллаж байна.